Азийн улс төрийн намуудын олон улсын (ICAPP) Залуучуудын байгууллагын тэргүүнээр Монгол Ардын Намын Удирдах зөвлөлийн гишүүн, Социал демократ Монголын залуучуудын холбооны ерөнхийлөгч, Н.Учралыг сонголоо.

ICAPP-ын олон улсын байгууллага нь нийгмийн олон бүлгийн нийтлэг эрх ашгийг илэрхийлсэн хэд хэдэн зөвлөлтэй бөгөөд манай улсад Залуучуудын VI, Эмэгтэйчүүдийн VII салбар хуралдаан болж байгаа юм. Залуучуудын VI хуралдаан “Цар тахлын дараах нийгэм, эдийн засгийн ахиц дэвшлийн төлөөх нийгмийн яриа хэлэлцээнд залуучуудыг оролцуулах нь” сэдвийн хүрээнд өрнөж байна.

Азийн хамгийн том улс төрийн намын байгууллага болох ICAPP-ын хоёр салбар хуралдааныг Монгол Улсад зохион байгуулах эрхийг Монгол Ардын Намд олгосон.

Монгол Ардын Намын хувьд 2004 оноос ICAPP-ын үйл ажиллагаанд идэвхтэй оролцож эхэлсэн бөгөөд 2013 онд Байнгын хорооны гишүүнээр элссэн юм. ICAPP нь Азийн 50 гаруй орны, 350 гаруй улс төрийн намыг эгнээндээ нэгтгэсэн, улс төрийн олон өөр үзэл баримтлалтай намуудын хамтын ажиллагааг таниулан сурталчлах, улс орнуудын итгэлцэл, харилцан ойлголцлыг сайжруулж, улс төрийн намуудын бүсийн хамтын ажиллагааны харилцааг идэвхжүүлэх зорилготой дэлхийн хэмжээний байгууллага юм.