МАН-ын дэргэдэх Ахмадын холбоо, Фридрих-Эбертийн сангийн Монгол дахь суурин төлөөлөгчийн газар, Стратеги академи, “Мэдлэгийн хотхон” судалгааны хүрээлэн хамтран “Ахмад настны нийгэм, улс төрийн оролцоо” сэдэвт судалгааны үр дүнг танилцуулах, үр дүнд суурилан ахмадын оролцоог нэмэгдүүлэх, дэмжих арга хэмжээг төлөвлөх, хэрэгжүүлэх зорилгоор 300 ахмадуудыг оролцуулан уг танилцуулгыг зохион байгууллаа.

Уг арга хэмжээнд УИХ-ын гишүүн, МАН-ын Ахмадын холбооны дарга Н.Энхболд, Фридрих-Эбертийн сангийн Монгол дахь суурин төлөөлөгч Бенедикт Ивановс, “Мэдлэгийн хотхон” судалгааны хүрээлэнгийн Ахлах судлаач Г.Наранбаяр, ХНХ-ын дэд сайд П.Зулпхар, Эрүүл мэндийн дэд сайд С.Энхболд нар оролцож судалгаа хийх болсон шалтгаан, судалгааны үр дүн, авч хэрэгжүүлж буй арга хэмжээ болон, баримталж буй бодлого, цаашдын зорилтыг танилцуулсан юм. 

Судалгааны үр дүнгээс үзэхэд

• Ахмадуудын талаар мэдээлэл, статистик, мэдээллийн сан тун бага байна.
• Хөдөлмөрийн тухай хуулийн хэрэгжилт тийм ч сайн биш, зарим хууль хоорондоо авцалдахгүй зөрчилдөх байдал
• Залуучууд ахмад үеэс ихийг авч үлдэх сонирхол их байна.
• Ахмад настны эрхийн зөрчил нь хувийн орон зайд нь халдаж буйгаар илэрдэг.
• Удирдах албан тушаалтны удирдахуйн ухааны ур чадвар дутмаг байгаагаас ахмад настантай харьцаж, тэднийг удирдан чиглүүлж чадахгүй байна.
• Ахмадууд санхүүгийн байдалдаа нэг их санаа зовдоггүй хэдий ч тэтгэврийн хэмжээнд сэтгэл гундуу байна гэсэн дүгнэлтүүд гарчээ.

Танилцуулгын хүрээнд ахмадууд санал хүсэлтээ илэрхийлж, холбогдох албан тушаалтнуудаас хариулт авсан юм.