Энэ жил Монгол Ардын Намын түүхт 99 жилийн ой тохиож байна. Монгол Ардын нам жил бүрийн “Эх орончдын баярын өдөр”-ийг тохиолдуулан аймаг, нийслэлийн намын байгууллагуудынхаа үйл ажиллагаанд үнэлэлт дүгнэлт өгч шилдгүүдийг шалгаруулдаг уламжлалтай.

Энэ жилийн шилдгийн шилдэг намын байгууллагаар Баянгол дүүргийн намын хороо шалгарлаа.  

Монгол Ардын Намын Ерөнхий нарийн бичгийн дарга Д.Амарбаясгалан өнөөдөр шилдгээр шалгарсан Баянгол дүүргийн намын хорооны хамт олныг хүлээн авч, тус намын хорооны дарга Ж.Ганбаатар, дэд дарга Б.Сэмжидмаа нарт шилжин явах цом, батламж, мөнгөн шагналыг гардуулсан юм.

Баянгол дүүргийн намын хороо шилдгийн шилдэг намын байгууллагаар шалгарсан нь дүүргийн намын хороод дундаа анхдагч нь болж байгааг Монгол Ардын намын Ерөнхий нарийн бичгийн дарга Д.Амарбаясгалан энэ үеэр онцлов. Мөн Ж.Ганбаатар даргаар ахлуулсан Баянгол дүүргийн намын хороо, тэргүүлэгчид, намын хорооны гишүүдэд намын дарга, гишүүд дэмжигчдийн нэрийн өмнөөс баяр хүргэж, амжилт хүссэн юм.

Баянгол дүүргийн Монгол Ардын Намын хороо МАН-ын XXVIII Их хурлаар шинэчлэн баталсан намын дүрмийн дагуу намын анхан шатны байгууллагын шинэчилсэн бүтцийг манлайлан зохион байгуулж, 23 үүртэй байсныг 23 хорооны намын хороо, 106 үүртэй болгон өргөтгөсөн. Мөн намын гишүүдийн идэвхи оролцоог нэмэгдүүлэхэд онцгойлон анхаарч ажилласан нь шилдгийн шилдгээр шалгарах гол үзүүлэлт болсон байна. Өнгөрсөн онд үйл ажиллагаагаа өргөтгөж, гишүүд дэмжигчидтэйгээ илүү ойр ажиллах үүднээс Баянгол дүүрэг намын хорооны II байраа ашиглалтад оруулсан.

Түүнчлэн Монгол Ардын Намын “Цахим нам” болох зорилтын хүрээнд Баянгол дүүргийн намын хороо намын гишүүдийн бүртгэлээ 100 хувь цахим болгож бүртгэлжүүлсэн байна.

Баянгол дүүргийн намын хороо нь өнгөрсөн онд бодлогын томоохон ажлуудыг бусад аймаг, дүүргийн намын хороодыг манлайлан амжилттай биелүүлснээс гадна залуучууд эмэгтэйчүүд, оюутнуудад чиглэсэн олон шинэлэг арга хэмжээнүүдийг зохион байгуулж байна.

Үндэсний Эрх Чөлөө, Тусгаар Тогтнолоо сэргээсний 109 жилийн түүхэн ой өнөөдөр тохиож байна. Түүхэн өдрийн хүрээнд  МАН-ын дэргэдэх Стратеги академиас Солийн Данзангийн мэндэлсний 135 жилийн ойд зориулсан эрдэм шинжилгээний хурлыг зохион байгууллаа.

Тус хуралд Монгол Улсын Шадар сайд, “Солийн Данзан сан”-гийн тэргүүн Я.Содбаатар, Монгол Ардын намын хяналтын хорооны дарга Б.Баярбаатар, Стратеги академийн захирал Х.Сайхансанаа болон эрдэмтэн, судлаачид оролцлоо.

Хэлэлцүүлгээр С.Данзангийн Монгол улсын хөгжилд оруулсан түүхэн гавьяаг олон нийтэл таниулах, эрдэмтэн судлаачдын судалгаа, эрдэм шинжилгээний бүтээл, байр суурийг нэгтгэх, санал зөвлөмжийг нэгтгэн хэвлүүлэх, номын сангуудад хүргэх чиглэлд анхаарч ажиллахаар тогтлоо.

Энэ үеэр МУБИС-ийн Түүх, Нийгмийн шинжлэх ухааны сургуулийн багш, доктор А.Алтанбагана, Шинжлэх ухааны гавьяат зүтгэлтэн, доктор, ШУА-ийн Түүх, угсаатны зүйн хүрээлэнгийн Захирлын үүргийг түр орлон гүйцэтгэгч Н.Хишигт, Доктор, дэд профессор Л.Дашням, Түүхийн шинжлэх ухааны доктор, профессор, Шинжлэх ухааны гавьяат зүтгэлтэн З.Лонжид нар Солийн Данзантай холбоотой үйл явдал, 1921 оны Монголын хувьсгалын дипломат түүхэнд оруулсан хувь нэмэр, сангийн яамны тэргүүн сайд байх үетэй холбоотой илтгэл тавьж хэлэлцүүллээ.

Солийн Данзан нь Монгол Ардын Намын анхны дарга, Сангийн яамны тэргүүн сайд, 1923 онд Ерөнхий сайдын жинхэнэ орлогч, Бүх цэргийн жанжны албыг хашиж байсан юм.  Мөн Монголын ард түмний эрх чөлөө, тусгаар тогтнолын төлөө тууштай тэмцэгч, нам, улс төр, нийгмийн зүтгэлтэн төдийгүй санхүү, эдийн засгийн салбарт чухал үүрэг гүйцэтгэсэн төдийгүй өөрийн гэсэн үзэл бодолтой, төр, нийгмийн томоохон зүтгэлтэн юм.